23-12-2024

خبرنامہ نمبر7947/2024
گوادر 23 دسمبر2024: ڈپٹی کمشنر حمود الرحمٰن کی زیر صدارت ڈسٹرکٹ ایجوکیشن کمیٹی کا اجلاس منعقد ہوا، جس میں ایڈیشنل ڈپٹی کمشنر (جنرل) ڈاکٹر عبدالشکور ڈسٹرکٹ ایجوکیشن آفیسر زاہد حسین، ڈسٹرکٹ ایجوکیشن آفیسر (فیمیل) بلقیس سلیمان، اور دیگر اسٹیک ہولڈرز نے شرکت کی۔ اجلاس میں ضلع کے غیر فعال اسکولوں کی بحالی، اساتذہ کی تعیناتی، اور تعلیمی معیار کو بہتر بنانے کے لیے اہم امور پر تفصیلی گفتگو کی گئی۔
ڈپٹی کمشنر حمود الرحمٰن نے ضلع میں تمام غیر فعال اسکولوں کی تفصیلی رپورٹ طلب کی اور واضح کیا کہ ان کی ذاتی کاوشوں سے ضلع کے بیشتر غیر فعال اسکولوں کو دوبارہ فعال کیا گیا ہے۔ انہوں نے کنٹریکٹ کی بنیاد پر اساتذہ کی تعیناتی یقینی بنائی اور ان کی تنخواہیں ڈپٹی کمشنر آفس کی جانب سے جاری کی جا رہی ہیں۔
ڈپٹی کمشنر نے اس موقع پر کہا، “تعلیم ہر بچے کا بنیادی حق ہے، اور یہ حق فراہم کرنا ہماری اجتماعی ذمہ داری ہے۔ کوئی بھی اسکول اساتذہ کی کمی کی وجہ سے بند نہیں ہوگا۔” انہوں نے مزید کہا کہ باقی غیر فعال اسکولوں کو جلد از جلد فعال کیا جائے گا تاکہ بچوں کو معیاری تعلیم کی سہولت فراہم کی جا سکے۔
ڈپٹی کمشنر نے اعلان کیا کہ گرلز اسکولوں میں واش رومز تعمیر کیے جائیں گے اور جن اسکولوں میں بجلی یا سولر سسٹم موجود نہیں، وہاں ابتدائی طور پر 16 گرلز اسکولوں کو یہ سہولت فراہم کی جائے گی۔ڈپٹی کمشنر نے غیر حاضر اساتذہ کی تفصیل طلب کرتے ہوئے کہا کہ تعلیم اور صحت جیسے بنیادی شعبوں میں کسی قسم کی غفلت برداشت نہیں کی جائے گی۔ انہوں نے متعلقہ حکام کو ہدایت دی کہ غیر حاضر اساتذہ کی نشاندہی کریں تاکہ ان کے خلاف سخت کارروائی کی جا سکے۔ڈپٹی کمشنر نے اجلاس کے دوران کہا کہ تعلیم کی فراہمی صرف ایک ذمہ داری نہیں بلکہ معاشرے کے روشن مستقبل کی ضمانت ہے۔ ان کے عزم کے مطابق، ضلع گوادر میں کوئی بھی بچہ تعلیم کے بنیادی حق سے محروم نہیں رہے گا۔
ڈپٹی کمشنر حمود الرحمٰن کے اقدامات کو عوامی حلقوں میں سراہا جا رہا ہے۔ یہ اقدامات نہ صرف تعلیمی نظام میں بہتری لا رہے ہیں بلکہ والدین اور طلباء میں اعتماد بحال کر رہے ہیں۔
یہ اجلاس ضلع میں تعلیمی اصلاحات کے لیے ایک اہم پیش رفت ہے اور ان فیصلوں سے امید کی جا رہی ہے کہ گوادر میں تعلیمی معیار میں نمایاں بہتری آئے گی۔