25-12-2024

خبرنامہ نمبر 8002/2024
گوادر 25دسمبر:ڈپٹی کمشنر گوادر حمود الرحمٰن کی خصوصی ہدایت پر اسسٹنٹ کمشنر مہیم خان گچکی نے پانی کے دیرینہ مسائل کے حل کے لیے تحصیل پسنی کے مختلف یونین کونسلز میں ایک اہم اجلاس کا انعقاد کیا۔ اجلاس میں پبلک ہیلتھ انجینئرنگ کے انجینئر نواز بلوچ اور متعلقہ یونین کونسلز کے چیئرمین نے شرکت کی۔اجلاس میں ان یونین کونسلز پر خاص توجہ دی گئی جنہیں پانی کی قلت کا سامنا ہے، جن میں کللانچ، سردشت، ہڈوکی، اور کلمت شامل ہیں۔ اجلاس کے دوران پانی کی فراہمی کے موجودہ نظام، چیلنجز، اور ممکنہ حل پر تفصیلی غور و خوض کیا گیا۔اسسٹنٹ کمشنر مہیم خان گچکی نے بتایا کہ ان علاقوں میں روزانہ کی بنیاد پر ٹینکروں کے ذریعے پانی کی فراہمی یقینی بنائی جا رہی ہے۔ انہوں نے مزید کہا کہ یہ اقدامات عارضی بنیادوں پر کیے جا رہے ہیں تاکہ متاثرہ علاقوں میں روزمرہ کی ضروریات پوری کی جا سکیں، جبکہ مستقل بنیادوں پر مسائل کے حل کے لیے پبلک ہیلتھ انجینئرنگ کی ٹیم کے ساتھ حکمت عملی مرتب کی جا رہی ہے۔علاقائی چیئرمینز نے پانی کی قلت کے حل کے لیے حکومتی اقدامات کو سراہا اور متعلقہ محکموں کے ساتھ مکمل تعاون کی یقین دہانی کرائی۔ اجلاس کے اختتام پر فیصلہ کیا گیا کہ پانی کی فراہمی کو مزید بہتر بنانے کے لیے قلیل اور طویل مدتی منصوبے جلد از جلد شروع کیے جائیں گے، تاکہ مقامی آبادی کو مستقل بنیادوں پر پانی کی فراہمی ممکن بنائی جا سکے۔عوامی حلقوں نے اسسٹنٹ کمشنر کے مؤثر اقدامات اور پانی کے مسائل پر سنجیدہ توجہ کو سراہا اور امید ظاہر کی کہ ان اقدامات سے تحصیل پسنی کے عوام کو جلد ریلیف ملے گا۔